Quam on save, presc chascun auxlingue es creat por esser é facilmen reconossibil, é facil a aprender. Usante fontes por trovar lor vocabularium, un auxlingue posse esser un ponte ínter pluri natural lingues. Felicimen, Occidental sta ínter li tri max recent grand lingues del diplomatie del presente e passate: anglés, francés e latin.
Occidental e latin
Un brevi inspection de quel sententies in latin e Occidental monstra li similitá del vocabularium del du lingues:
Abyssu abyssum invocat: Li abiss invoca li abiss
Aurea mediocritas: Aurin mediocritá
Coram populo: Coram popul
Dignus est intrare: Il es digni intrar
In cauda venenum: In li caude es li venen
Memento, homo, quia pulvis es et in pulverem reverteris: Memora, hom, que tu es polve e que tu va retornar al polve
O sancta simplicitas: O sant simplicitá
Post tenebres lux: Pos tenebres, li luce
Veni, vidi, vici: Venit, videt, victet
A saver, por li futuri parlantes de Occidental quam lingue comun, un comprension de omni tri lingues (anglés, francés e latin) ne vell esser un defí tre desfacil - e ili va posseder li clave al conossentie del passate.
Nu lass nos pensar pri li position de quelc altri lingues con respecte a lor ligament al passate.
Lingue chinés
Li lingue chinés sta in un felici position, pro que mem li scritura del annus A.C. ne es totmen diferent de tis usat hodie. Vi un exemple de chinés scrit 100 annus A.C. al dextri comparat con lu al levul, quel es li stil de hodie:
E mem li scritura al dextri es usat ye vezes por coses tales quam sigilles oficial (por firmas, personal nómines, etc.). Curtmen dit, li chineses possede un direct ligament al conossentie de lor passate.
Lingue grec
E lu sam vale por grec, quel have 2800 annus de scrition con lor alfabet usat hodie. Li max ancian scrites es desfacil, ma con efortie on posse comprender les, e li grec desde li koiné es tre comprensibil mem sin mult studie. Dunc, anc ili possede li ligament al passate.
Lingue anglés
E lu sam vale por anglés. On posse comprender mem Beowulf con sat mult studie.
Támen!
Hay un grand ligament a nor passate a quel noi ne possede un ligament. Vi un diagramma quel monstra li témpores de usation del lingues mentionat in supra, con du lingues in plu:
Vi li problema: li conossentie del lingue egiptian scrit in hieroglifes es presc ne-existent. Hay specialistes qui conosse li lingue, e li lingue coptic existe ancor, ma li lingue coptic ne es scrit in hieroglifes e in omni casu ti lingue sta in un desfacil position in modern Egiptia.
E in li diagramma on posse vider anc que li historie del egiptian lingue quam scrit lingue es mult plu ancian quam omni altris mentionat in supra! Por retrovar li conossentie del passate e ligar it con li lingue coptic existent hodie, noi besona un auxlingue. It vell esser un auxlingue autonom, ma facilmen comprensibil - just quam Occidental. It vell esser scrit in hieroglifes, ne omni hieroglifes ma sat mult por dar al aprensor li possibilitá de leer li ancian scrites. E quam lingue parlat, it vell dar al aprensor li possibilitá de audir e comprender li lingue coptic.
Un tal lingue vell servir a ambi láteres: li retrovation del conossentie del ancian egiptian, e li fortification del hodial coptic lingue. (On suposi que ti auxlingue vell haver li possibilitá de esser scrit con li alfabete grec in prim, e que li studiantes poc a poc vell aprender li hieroglifes)
Li sol problema es: qualmen crear un tal lingue? Por mi parte mi spíritu es pret, ma mi conossenties es ancor minimal, anc mi líber témpor. Pro to yo va solmen scrir ti-ci articul por parlar denov pri li subjecte por que altres mey pensar pri it.
It es un interesant idé, fórsan si on posse crear un serie de libres o filmes pri fictional historie de Egipte con un poc de tal lingue usat ci e ta quam in libres de Tolkien, to vell esser un bon propagation de cultura egiptian e posse auxiliar ti lande financialmen.