Li numeró de Cosmoglotta 326 por januar - decembre 2020 aparit ye li comensa de 2021. Ta trovat se un interessant articul scrit de Vicente Costalago pri “Li casu del hebreic quam exemple por Occidental”. Vi qualmen comensa li articul:
In li articul, il cita li professor Itamar Even-Zohar de Israel, qui ha scrit mult pri li relationes inter li litteratura e li lingue.
Li semane passat, li sam Vicente Costalago fat un decovrition íncredibil: li sam Itamar Even-Zohar self in li passate hat usat Occidental-Interlingue! Quam pur coincidentie Vicente trovat un lettre scrit de Professor Even-Zohar in 1957 (quande il esset ancor un yun studiante) a L. M. de Guesnet.
Vi li lettre:
Serchante information pri le, yo videt sur Wikipedia e su situ web que il es ancor activ professionalmen e que hay un adresse electronic por contactar. Yo inviat le un e-posta…e pos quelc hores recivet un response! Un parte del response es quam seque:
Mersí pro ti-ci íncredibil surprise. Yo deve confesser que yo memora necos pri mi corespondentie con de Guesnet. Quande yo scrit li lettre in 1957 yo hat just finit mi studies in li licéo...tande yo havet un grand interesse in li projectes por un international lingue, e quam resultate yo scrit un sort dissertation pri les quam mi "projecte final" scolari...yo ha usat Esperanto por mult annus ma ne plu es un activ membre del movement...con max bon salutationes pro ti-ci unic pezze de memorie,
Itamar
Pos to il dat li permission de monstrar li lettre al comunité, quel es li rason pro quo it apari ci in li scrite por ti-ci semane. Il inviat me li textu scrit con Google Lens quel successat transformar li original lettre in copabil textu computatori, ma yo es curiosi ca li letores save ancor leer li scritura cursiv (benque it es solmen un poc cursiv). Esque vu posse comprender li tot lettre? Por mi parte yo comprendet it 100%.
In li sequent e-posta il informat me que tande il esset un abonnator de Cosmoglotta, e considerante que durant li guerre mem in Svissia on havet abonnatores in 58 cités, it es fórsan ne surprisant que tande un yun Sr Even-Zohar vell har facilmen savet que existe un tal jurnale por un auxiliari lingue nominat Interlingue.
(Hodie li industrie printatori ha changeat se tam mult que on presc ne posse imaginar payar por information, considerante que on posse obtenir it sin custa omniloc sur li internet. Ma tande Cosmoglotta esset li centre de information e li principal loc por trovar persones con quel coresponder.)
Plu on sercha in li archives de CDELI, plu on trova agreabil surprises! Obliviat nov-decovrit libres, lettres e nov amics! Li sercha in li biblioteca de Chaux-de-Fonds continua.
Surprisantmen observar qualmen un vez eminent person usat Occidental!
It es un interessantissim trove! Yo comprendet presc tot, ti scritura es surprisantmen tre clar. Mersí pro partir ti afabil pezze de historie!